Ja se si realizon skulptura të bukura nga enët e kuzhinës

Ish-punonjësja në sektorin e turizmit dhe hotelerisë, Aysel Icli, në qytetin turk Kemer, në afërsi të Antalyas, bën skulptura nga enët e kuzhinës, duke përdorur pirunë, thikë, lugë, tenxheret, madje edhe tavët.

Fun

10/08/2015 17:03

Ajo është diplomuar në Akademinë e Artit në Universitetin e Stambollit. Materialin e nevojshëm për skulpturat e gjen në tregjet dhe zonat industriale, shkruan Anadolu Agency.

Aysel Icli punimet e saj i ekspozon në oborrin e hotelit familjar. Ajo merret me art që nga fëmijëria, kjo gjithmonë ishte ëndrra e saj, por siç thotë, babai i saj dëshironte që të studiojë për Drejtësi.

Kjo artiste ka filluar me bërjen e skulpturave kryesisht nga monotonia, ndërsa pastaj edhe të argëtojë fëmijët.

“Kur u shpërngulëm këtu nuk kishte asgjë. Kështu njëherë vajta në zonën industriale dhe morra disa tela. U ula dhe u përpoqa të bëj diçka. Në vitet shtatëdhjetë të shekullit të kaluar fillova të merresha me këtë për argëtim. Pasi që kemi hapur hotelin, këtu e vendosa edhe punëtorinë time. Aty kaloj shumicën e kohës”, shpjegon Icli.

Ajo vë në dukje se ka disa miq që i propozojnë të hapë një ekspozitë.

“U them se nuk më duhet ekspozitë më e mirë nga kjo që kam në hotel. Këtu për gjysmë vjet vijnë mbi dy mijë njerëz. Bëjnë fotografi dhe shkojnë. A do të vinin aq shumë njerëz në ekspozitë?”, pyet Icli.

Gjithashtu tregon se familja dhe miqtë vazhdimisht i sjellin material të ri për bërjen e skulpturave. Por ajo tregon se nuk e ka ndërmend të shesë skulpturat e saj.

“Skulpturat i bëj për veten time. Ka shumë prej tyre që do t’i blinin, por ato nuk janë në shitje”, theksoi Icli.