Një lajm i trishtuar ka ardhur nga futbolli italian. Joan Gonzalez, mesfushori i ri dhe me të ardhme premtuese, është detyruar të varë këpucët në gozhdë në moshën vetëm 23-vjeçare, pasi mjekët e Lecce-s zbuluan një problem serioz në zemër gjatë testeve të parasezonit.

Gonzalez, i cili u formua në akademinë e të rinjve të Barcelonës, iu bashkua Lecce-s në vitin 2021 dhe arriti të bëjë 64 paraqitje në Serie A, duke shënuar dy gola dhe dhënë katër asistime. Por pas zbulimit të një parregullsie në zemër, u rekomandua që të priste një vit për të parë nëse trajtimi do të përmirësonte gjendjen.

Për fat të keq, situata mbeti e pandryshuar dhe Gonzalez vendosi të tërhiqej përfundimisht nga futbolli.

“Ia shpëtuam jetën,” deklaroi presidenti i Lecce-s, Saverio Sticchi Damiani, në një konferencë për shtyp në fund të sezonit.
“Dua të falënderoj stafin tonë mjekësor dhe kardiologun, profesor Tondo, që zbuluan këtë parregullsi. Gjithashtu e përgëzoj Gonzalezin për mënyrën e qetë si e priti këtë lajm.”

Pavarësisht goditjes së madhe, Gonzalez nuk humbi kohë dhe tashmë është regjistruar në universitet për të studiuar ekonomi dhe menaxhim biznesi, duke shpresuar që në të ardhmen të mbetet pjesë e botës së futbollit, por në një rol jashtë fushës.