Irani lëshoi të enjten një paralajmërim të ri për anijet që të ndjekin rrugët e përcaktuara nga Teherani përmes Ngushticës së Hormuzit, duke vënë edhe një herë në pah tensionet rreth kësaj rruge ujore jetike, shkruan CNN.

Çdo mosrespektim i këtij paralajmërimi “do të përballet me një përgjigje të menjëhershme dhe të vendosur nga forcat e armatosura, duke vënë në rrezik sigurinë e anijeve që shkelin këtë urdhër”, paralajmëroi komanda e përbashkët ushtarake e Iranit në një deklaratë, sipas agjencisë gjysmëzyrtare të lajmeve Fars.

Qarkullimi nëpër ngushticë tashmë është ndarë në disa rrugë – njëra përgjatë bregdetit iranian, një tjetër pranë bregdetit të Omanit dhe një e tretë, e cila përdorej para luftës, që kalon në mes të ngushticës.

Irani është përpjekur t’i dekurajojë anijet që të përdorin dy rrugët e fundit, pasi ato dobësojnë kontrollin e tij mbi ngushticën. Të enjten, Garda Revolucionare e vendit paralajmëroi anijet që kalojnë nëpër këtë rrugë ujore se do të jenë “përgjegjëse për çdo pasojë” nëse përdorin rrugë të tjera.

Statusi i kësaj rruge ujore, përmes së cilës kalon një e pesta e furnizimit botëror me naftë dhe gaz natyror të lëngshëm, është bërë një nga pengesat kryesore në negociatat mes Iranit dhe Shteteve të Bashkuara.

Ky paralajmërim i fundit vjen një ditë pasi Komanda Qendrore e SHBA-së (CENTCOM) u takua në Bahrein me përfaqësues të 12 vendeve të Lindjes së Mesme. Gjatë atij takimi, ata “diskutuan situatën aktuale të sigurisë në rajon” dhe “theksuan angazhimin e tyre të përbashkët për rrjedhën e lirë të tregtisë përmes Ngushticës së Hormuzit”, thuhet në një deklaratë të CENTCOM-it.