Inspektorati i Mjedisit ka vendosur shiritat e mbylljes në restorantin dhe hotelin “Liqeni i Dukagjinit”, në Gjakovë, duke ndërprerë veprimtarinë e tij në zonën e mbrojtur të Liqenit të Radoniqit.

Lajmin e ka bërë të ditur ministrja në detyrë e Mjedisit, Fitore Pacolli, e cila tha se institucioni që drejton do të vazhdojë të ndërmarrë masa për mbrojtjen e ujërave dhe zonave të mbrojtura në Kosovë, transmeton lajmi.net.

“Si Ministri, do të vazhdojmë të veprojmë me vendosmëri për mbrojtjen e ujërave dhe zonave të mbrojtura të Kosovës”, ka shkruar Pacolli.

Ajo ka theksuar rëndësinë e mbrojtjes së burimeve ujore, duke thënë se uji i pijshëm është pasuri publike dhe se për mbrojtjen e tij “nuk ka kompromis”.

Sipas njoftimit të ministres, ndërhyrja e Inspektoratit ka për qëllim ndalimin e veprimtarisë që, sipas institucioneve, po zhvillohej në kundërshtim me rregullat në zonën e mbrojtur të Liqenit të Radoniqit.