Presidenti i FIFA-s, Gianni Infantino, ka lënë të hapur mundësinë për rritje të konsiderueshme të fondeve për të gjitha 211 federatat anëtare të organizatës botërore të futbollit.

Këshilli i FIFA-s pritet ta shqyrtojë çështjen në mbledhjen e 15 tetorit, ndërsa Infantino, në një letër dërguar presidentëve të gjashtë konfederatave kontinentale, ka deklaruar se do të mbështesë “nivelin më të lartë të financimit shtesë që mund të ofrohet në mënyrë të përgjegjshme”.

Megjithatë, presidenti i FIFA-s ka theksuar se asnjë shumë që është diskutuar deri më tani nuk përbën një angazhim të miratuar.

Në letrën e tij, Infantino ka rikujtuar edhe propozimin tashmë të tërhequr për shitjen e një pjese të të drejtave komerciale të Kupës së Botës, duke thënë se synimi ishte gjenerimi i të ardhurave shtesë për investime në futboll.

“Propozimi i fundit komercial, i cili tani është tërhequr, kishte për qëllim t’i mundësonte FIFA-s të investonte më shumë në futboll”, shkroi Infantino.

Më 18 shtator, presidenti i UEFA-s, Aleksander Ceferin, dhe presidenti i CONCACAF-ut, Victor Montagliani, kishin propozuar që secila prej 211 federatave anëtare të FIFA-s të merrte nga 10 milionë dollarë gjatë ciklit 2027-2030.

Infantino ka sinjalizuar se do të mbështeste një nivel të tillë financimi, nëse ai mund të miratohet përmes procedurave përkatëse të qeverisjes së FIFA-s.

“Unë do të mbështes nivelin më të lartë të financimit shtesë që mund të ofrohet në mënyrë të përgjegjshme përmes procesit të duhur të qeverisjes së FIFA-s”, tha ai.

FIFA konfirmoi në fillim të shtatorit se Infantino do të kandidojë për një mandat tjetër në zgjedhjet presidenciale që do të mbahen në marsin e ardhshëm.

Ndërkohë, pavarësisht kritikave ndaj planit të tij tashmë të braktisur për përfshirjen e investimeve private në Kupat e Botës për meshkuj dhe femra, Infantino vazhdon të ketë mbështetje nga disa prej aktorëve të rëndësishëm të futbollit botëror. Arabia Saudite, organizatore e Kupës së Botës 2034, e ka mbështetur atë, ndërsa në favor të kandidaturës së tij janë shprehur edhe CAF dhe CONMEBOL.