Instituti i Kosovës për Drejtësi (IKD) ka dënuar linçimin publik, kërcënimet dhe presionin ndaj gazetarëve Fidan Jupolli dhe Lirim Mehmetaj, duke kërkuar reagim të shpejtë nga institucionet e vendit për të garantuar sigurinë e tyre dhe lirinë e medias.

Në një komunikatë të publikuar të martën, IKD ka vlerësuar se këto zhvillime cenojnë jo vetëm sigurinë e gazetarëve, por edhe lirinë e shprehjes dhe të drejtën e qytetarëve për t’u informuar.

Sipas IKD-së, institucionet kanë përgjegjësi të sigurojnë që gazetarët ta ushtrojnë profesionin pa frikë dhe pa presion për t’u tërhequr nga qëndrimet e tyre publike.

Duke iu referuar rastit të Fidan Jupollit, IKD ka theksuar se shqetësimi i ngritur nga Asociacioni i Gazetarëve të Kosovës për integritetin fizik të gazetarit dhe familjes së tij kërkon trajtim urgjent dhe serioz institucional. Sipas institutit, etiketimi i gazetarëve si të lidhur me interesa armiqësore për shkak të qëndrimeve të tyre publike mund të rrezikojë sigurinë e tyre dhe të familjarëve.

Ndërkaq, lidhur me rastin e Lirim Mehmetajt, IKD ka përmendur deklarimin e gazetarit se ishte kërcënuar pas refuzimit për ta larguar një postim kritik ndaj deputetit Fatos Geci.

Instituti ka kërkuar që ndalimi i Gani Gecit për 48 orë, nën dyshimin për kanosje, të pasohet nga një hetim i plotë dhe i paanshëm, duke respektuar prezumimin e pafajësisë.

IKD ka rikujtuar se nenet 40 dhe 42 të Kushtetutës së Kosovës garantojnë lirinë e shprehjes dhe të mediave, ndërsa neni 10 i Konventës Evropiane për të Drejtat e Njeriut mbron edhe kritikën e ashpër dhe satirën politike, brenda kufijve të përcaktuar nga Konventa.

“Mospajtimi me një gazetar nuk krijon të drejtë për ta kërcënuar apo për t’ia diktuar përmbajtjen”, thuhet në komunikatë.

IKD ka kërkuar nga Qeveria e Kosovës që të distancohet publikisht nga këto veprime, t’i dënojë ato dhe të kërkojë ndaljen e tyre. Instituti ka kritikuar edhe heshtjen e Qeverisë, duke vlerësuar se ajo mund të krijojë perceptimin e tolerimit të presionit ndaj gazetarëve.

Thirrje për distancim nga kërcënimet dhe fushatat linçuese IKD u ka drejtuar edhe subjekteve politike, duke kërkuar që ato të mos i tolerojnë veprimet e tilla nga mbështetësit e tyre.

Po ashtu, IKD i ka bërë thirrje Presidentes së Kosovës, Justina Shiroka-Pula, që të reagojë publikisht dhe pa vonesë. Sipas institutit, Presidentja duhet t’i dënojë këto veprime dhe të kërkojë nga institucionet përgjegjëse mbrojtjen efektive të gazetarëve.

Në fund, IKD ka kërkuar nga Policia dhe Prokuroria e Shtetit që të zhvillojnë hetime të shpejta, të pavarura dhe efektive për kërcënimet, të vlerësojnë nivelin e rrezikut dhe, sipas nevojës, të ndërmarrin masa mbrojtëse edhe për familjarët e gazetarëve të ekspozuar.

Sipas IKD-së, reagimi institucional duhet të parandalojë përsëritjen e rasteve të tilla dhe të sigurojë që përgjegjësit të përballen me ligjin. /Lajmi.net/