Presidenti i Shteteve të Bashkuara, Donald Trump, ka nënshkruar një urdhër për dyfishimin e tarifave për importet e çelikut dhe aluminit nga 25% në 50%, raporton BBC.

Ky veprim rrit taksat e importit për këto metale, të cilat përdoren në gjithçka, nga makinat te ushqimet e konservuara, për herë të dytë që nga marsi.

Trump ka thënë se masat, të cilat hynë në fuqi të mërkurën, kanë për qëllim sigurimin e së ardhmes së industrisë amerikane të çelikut.

Megjithatë, kritikët thonë se këto mbrojtje mund të shkaktojnë dëme të mëdha për prodhuesit e çelikut jashtë SHBA-së, të nxisin kundërmasa nga partnerët tregtarë dhe të kenë kosto të lartë për përdoruesit amerikanë të metaleve.

Orë para se ai të rriste tarifat, shumë kompani të prekura drejtpërdrejt mezi e besonin se plani po ecte përpara, duke shpresuar se do të ishte një masë e përkohshme ose një taktikë negociuese.

Edhe teksa Trump po nënshkruante urdhrat, Mbretërisë së Bashkuar iu dha një përjashtim nga masat, duke lënë tarifat për çelikun dhe aluminin e saj në nivelin 25%. Trump tha se kjo pasqyronte bisedimet e vazhdueshme tregtare mes dy vendeve.

“Kur bëhet fjalë për zotin Trump gjithmonë qëndron pyetja: a është kjo një taktikë apo një plan afatgjatë?” tha Rick Huether, drejtor ekzekutiv i Independent Can Co, një kompani me bazë në Maryland, e cila importon çelik nga Evropa dhe e shndërron atë në kuti biskotash dekorative, kuti kokoshkash dhe produkte të tjera.

Veprimet e Trump më herët këtë vit e kishin shtyrë atë të pezullonte investimet dhe të rriste çmimet. Ai tha se kishte frikë se klientët e tij do të kalonin te alternativa si kutitë plastike apo prej letre për shkak të gjithë kësaj pasigurie.

“Ka shumë kaos”, tha ai.

SHBA është importuesi më i madh në botë i çelikut, pas Bashkimit Evropian, duke e marrë shumicën e metalit nga Kanadaja, Brazili, Meksika dhe Koreja e Jugut, sipas qeverisë amerikane.

Gjatë mandatit të tij të parë, Trump vendosi tarifa prej 25% për çelikun dhe 10% për aluminin, duke cituar një ligj që i jep atij autoritet për të mbrojtur industritë që konsiderohen jetike për sigurinë kombëtare.

Por shumë importe përfundimisht shpëtuan nga këto tarifa, pasi SHBA arriti marrëveshje tregtare me aleatët dhe dha përjashtime për disa importe me kërkesë të kompanive.

Trump i përfundoi këto përjashtime në mars, duke thënë se ishte i pakënaqur me mënyrën se si ishin dobësuar masat mbrojtëse.

Gjatë një tubimi të premten në fabrikën US Steel, ai tha se donte të vendoste tarifa aq të larta sa që bizneset amerikane të mos kishin zgjidhje tjetër përveçse të blinin nga furnizuesit amerikanë.

“Askush nuk do të mund ta kapërcejë këtë,” tha ai për normën 50%. “Kjo do të thotë se askush nuk do të mund ta vjedhë industrinë tuaj. Në 25%, ata mund të kalojnë mbi atë gardh. Në 50%, nuk e kapërcejnë dot më”.