Kryetari i Komunës së Suharekës, Bali Muharremaj, ka reaguar lidhur me rastin e hedhjes së mbeturinave në hapësira publike, duke e cilësuar këtë veprim si të turpshëm dhe të dënueshëm.

Sipas tij rasti është hasur tek ura, në rrugën e cila e lidhë lagjen e Bajraktarëve me rrugën unazore në Suharekë.

Muharremaj ka bërë thirrje që personi përgjegjës për këtë veprim ta pastrojë këtë zonë.

“Ai i cili e ka bërë këtë vepër duhet ta pastrojë vendin. Ndryshe do të ballafaqohet me ligjin”, është shprehur Muharremaj.

Në të njëjtën kohë ka ftuar qytetarët që të jenë vigjilentë dhe ti raportojnë rastet e tilla tek organet komunale.

“E di dhe e kuptoj se edhe ju e dënoni këtë akt, andaj kudo që i shihni këta persona të papërgjegjshëm, i fotografoni dhe e njoftoni Drejtorinë e Inspeksionit në komunën tonë”,  ka deklaruar Muharremaj.