Kryetarja e Kuvendit, Albulena Haxhiu është pyetur nga mediat në lidhje me protestat e dhunshme në Shqipëri.

Ajo ka thënë se secili në Kosovë i ka përcjell me shqetësim zhvillimet atje.

“Ajo që po ndodh atje na shqetëson të gjithëve sepse Shqipëria për ne është shtëpi. Njësoj sikurse për mua besoj edhe për juve. Është shumë e rëndësishme që kërkesat e protestuesve duhet të dëgjohen nga institucionet”, tha Haxhiu pas mbledhjes së Kryesisë së Kuvendit.

Ajo ka kërkuar nga drejtuesit e institucioneve atje që t’i trajtojnë kërkesat e studentëve e jo t’i përgjigjen me arrogancë.

Besoj që secili prej drejtuesve të institucioneve atje, Kuvendi, Qeveria, Ministria e ka për obligim t’i trajtoj kërkesat e studentëve. A janë ato që kanë dal tash apo ato të shtresëzuara, pra që kanë nisur shumë më herët, para disa viteve. Ne nuk e mbështetim dhunën, ajo duhet të ndalohet nga të dyja palët. Mendoj se është e rëndësishme çasja serioze në raport me këto protesta, jo arroganca. Arroganca vetëm i nxit protestat, prandaj edhe thërras që me maturi, seriozitet të tejkalohen ndasitë apo qëndrimet e tyre që mund t’i kenë”, ka thënë Haxhiu.

Në lidhje me pjesëmarrjen e mbështetësve të VV-së në këto protesta, ajo ka thënë se VV nuk mban përgjegjësi.

“Asnjëherë nuk ka pas thirrje nga VV që të mbështetën protestat, nuk i takon VV-së kjo. Ajo nuk mund të mbahet përgjegjëse nëse mbështetësit tanë shkojnë të protestojnë atje”, ka thënë Haxhiu. /Lajmi.net/