Vazhdimin e mbështetjes së fermerëve dhe agrobizneseve vendore, e ka konfirmuar edhe njëherë kryeministri i Kosovës, Hashim Thaçi dhe ministri i Bujqësisë, Blerand Stavileci, gjatë një vizite në industrinë ushqimore “Abi” në Prizren, ku janë njohur për së afërmi me investimet e bëra në këtë fabrikë.

Kryeministri Thaçi, ka thënë se rritja e kapaciteteve prodhuese dhe përpunuese në këtë agrobiznes, ka bërë që tryezat e kosovarëve të jenë të mbushura me prodhime të freskëta vendore. “Qeveria e Kosovës edhe në të ardhmen do të jetë afër agrobizneseve dhe do ta mbështes rritjen dhe zhvillimin e tyre me të gjitha potencialet që kemi dhe në këtë zhvillim do të ndikojë edhe projekti për investimin e 500 milionë eurove në katër vitet e ardhshme, me të cilat do të gjenerojmë edhe 50 mijë vende të reja të punës”, ka thënë kreu i Qeverisë, raporton RTV 21.

Sipas tij, bashkëpunimi i Qeverisë me bizneset kosovare është çelësi i suksesit për modernizimin dhe zhvillimin e vendit tonë.

Në anën tjetër, ministri i Bujqësisë, Blerand Stavileci, ka treguar se kjo ministri i ka përkrahur agrobizneset dhe gjithë fermerët në mbarë Kosovën edhe përmes granteve investive, të cilat sipas tij kanë ndikuar në rritjen dhe zhvillimin e tyre. “E mbështetja përmes investimeve që pritet të bëhen në të ardhmen, do t’ju krijojnë mundësi fermerëve dhe agrobizenseve që t’i shtojnë edhe më shumë sipërfaqet e tokës së punueshme dhe t’i rrisin edhe kapacitetet prodhuese dhe përpunuese”, ka thënë ministri Stavileci.

Përmes granteve investive, vitin e kaluar me rreth 4 milionë euro ka përkrahur gjithsej 29 agrobiznese dhe njëra prej tyre është edhe “Abi”, e cila ka përfituar rreth 180 mijë euro grante investive nga Ministria e Bujqësisë, raporton RTV 21.