Hasani e njofton Kuvendin për përfundim të mandatit të tij në krye të Kushtetueses
Kryetari i Gjykatës Kushtetuese të Kosovës, Enver Hasani, ka kërkuar nga Kuvendi i Kosovës që të fillojë procedurën për propozimin e gjyqtarëve të rinj, të cilët prej qershorit të këtij viti do të emërohen në vend të tij dhe gjyqtarit Kadri Kryeziu.
Lajme
Pas gjashtë vitesh angazhim, gjyqtarët Hasani dhe Kryeziu, në mesin e këtij viti do të përmbyllin mandatet e tyre në Kushtetuese, dhe në bazë të dispozitave të Propozimit Gjithëpërfshirës për Statusin e Kosovës nuk kanë mundësi rizgjedhjeje.
Sipas zëdhënësit të Gjykatës Kushtetuese, Veton Dula, javë më parë kreu i këtij institucioni ia ka adresuar shkresën përkatëse Kuvendit të Kosovës.
“Kryetari i Gjykatës Kushtetuese, Enver Hasani, e ka njoftuar Kuvendin e Kosovës për skadimin e mandatit të tij, si dhe të gjyqtarit Kadri Kryeziu, më 26 dhjetor 2014, saktësisht 6 muaj para skadimit të mandatit të tyre (më 26 qershor 2015_ dhe në përputhje me afatin e parashikuar sipas Ligjit për Gjykatën Kushtetuese”, thuhet në përgjigjen me shkrim të Dulës, shkruan sot Koha Ditore.