Kandidati i PDK-së për kryeministër, Bedri Hamza, ka uruar 17 vjetorin e Pavarësisë së Kosovës.

Hamza ka përmendur në urimin e tij krerët e Ushtrisë Çlirimtare të Kosovës që po vazhdojnë të gjykohen në Hagë.

Hamza tha se sot nderojmë historinë tonë, i nderojmë ata që sakrifikuan, që luftuan dhe pareshtur u angazhuan për ta bërë Kosovën shtet të pavarur dhe demokratik.

“Me krenari dhe të palëkundur po e ndërtojmë një Kosovë, ku liria, barazia dhe drejtësia e forcojnë shtetin dhe shoqërinë”, deklaroi Hamza, transmeton lajmi.net.

Ai theksoi se në zemrat dhe mendjet e qytetarëve është forca e popullit tonë.

Postimi i plotë:

Sot është ditëlindja e 17-të e Republikës së Kosovës. Sot nderojmë historinë tonë. I nderojmë ata që sakrifikuan, që luftuan dhe pareshtur u angazhuan për ta bërë Kosovën shtet të pavarur dhe demokratik. I nderojmë ata që lirisë e pavarësisë ia vunë themelet dhe sot të privuar, shumë larg Kosovës, vazhdojnë ta paguajnë çmimin e tyre.

Me krenari dhe të palëkundur po e ndërtojmë një Kosovë, ku liria, barazia dhe drejtësia e forcojnë shtetin dhe shoqërinë.

Në zemrat dhe mendjet e qytetarëve është ëndrra e madhe për Kosovën. Në zemrat dhe mendjet e qytetarëve është forca e popullit tonë.

KOSOVË, e gëzofsh ditëlindjen e 17-të! Qytetarë krenarë, qëndroni të bashkuar dhe me shpresë!./Lajmi.net/