Kandidati i PDK-së për kryeministër, Bedri Hamza, ka premtuar politika më mbështetëse për sektorin privat, duke paralajmëruar ulje të barrës tatimore, grante për investime dhe masa që synojnë lehtësimin e aktivitetit të bizneseve në Kosovë.

Gjatë një vizite në kompaninë “Passable”, Hamza tha se zhvillimi ekonomik i vendit mbështetet te puna dhe investimet e sektorit privat, ndërsa shtoi se bizneset kanë nevojë për një qeveri që krijon mundësi dhe jo pengesa.

Ai theksoi se programi i PDK-së parasheh grante që mbulojnë deri në 30 për qind të investimeve për sektorët prodhues dhe inovativë, zgjerimin e Fondit të Garantimit të Kredive dhe krijimin e instrumenteve të reja financiare për bizneset e reja dhe startup-et.

Sipas Hamzës, bizneset me qarkullim vjetor deri në 10 mijë euro do të lirohen nga tatimi, ndërsa ato me qarkullim deri në 30 mijë euro do të tatohen vetëm mbi fitimin real.

Kreu i PDK-së premtoi gjithashtu ndryshime në mënyrën e pagesës së TVSH-së, duke propozuar që ajo të paguhet në momentin e shitjes së produktit dhe jo në kufi, masë që sipas tij do të përmirësojë likuiditetin e kompanive dhe do të krijojë kushte më të favorshme për investime dhe punësim.

Hamza tha se zhvillimi ekonomik, rritja e pagave dhe hapja e vendeve të reja të punës mbeten ndër prioritetet kryesore të programit të PDK-së për qeverisjen e ardhshme. /Lajmi.net/