Kandidati i Partisë Demokratike të Kosovës për kryeministër, Bedri Hamza, ka mbajtur një tubim elektoral në Mitrovicë, ku së bashku me strukturat e partisë ka prezantuar kandidatët për deputetë nga ky qytet.

Hamza ka deklaruar se pjesëmarrja e qytetarëve në këtë tubim i ka dhënë PDK-së energji, besim dhe vendosmëri për misionin politik që, sipas tij, synon t’i japë fund krizës në vend.

“Mitrovica sonte na dha energji, besim dhe vendosmëri për misionin tonë: t’i themi STOP krizës dhe ta ndryshojmë Kosovën”, ka shkruar Hamza.

Ai tha se kandidatët e prezantuar janë njerëz të dëshmuar që do t’u japin zë qytetarëve dhe zhvillimit të vendit.

Sipas Hamzës, Kosova ka nevojë për bashkim, seriozitet dhe një drejtim që sjell zhvillim, mirëqenie dhe shpresë për çdo familje.

“Më 7 qershor, bashkë do ta ndalim krizën dhe do ta hapim një kapitull të ri për Kosovën”, ka theksuar ai. /Lajmi.net/