Organizatorët e festivalit Glastonbury kanë vendosur të shesin disa mijëra bileta më pak këtë vit për të reduktuar grumbullimet e mëdha dhe për të përmirësuar përvojën e pjesëmarrësve.

Edhe pse festivali është i shitur plotësisht, nuk do të përdoret kapaciteti i plotë prej 210,000 vendesh.

Emily Eavis tha se ky ndryshim synon të ndikojë në mënyrën si lëvizin turmat, sidomos gjatë orareve më të ngarkuara, shkruan BBC.

Ndryshime të tjera përfshijnë zgjerimin e hapësirës te skena “Other Stage” dhe në zonën e natës Shangri-La, pas blerjes së tokës shtesë.

Eavis theksoi se, ndonëse askush nga 250 anëtarët e stafit nuk mendonte se festivali ishte i mbipopulluar vitin e kaluar, perceptimi publik është ndryshe. Këtë vit, vizitorët do të inkurajohen të përdorin itinerare të ndryshme për të shmangur bllokimet.

Falë aplikacionit të festivalit, organizatorët mund të parashikojnë se cilat zona do të jenë më të mbingarkuara, bazuar në interesin për artistët.

Festivali mbahet nga 25 deri më 30 qershor dhe pritet të drejtohet nga Olivia Rodrigo, The 1975 dhe Neil Young.

Në vitin 2024, Glastonbury dhuroi rreth 6.9 milionë euro për bamirësi – shifra më e madhe ndonjëherë.

Megjithatë, humbjet prej 11.7 milionë eurosh për shkak të pandemisë i kanë detyruar organizatorët të gjenerojnë disa të ardhura vitet e fundit. Vetëm moti me shi mund t’u kushtojë rreth 1.2 milionë euro për përgatitjet në terren.

Yjet paguhen shumë më pak se në koncertet komerciale, megjithatë tarifat janë rritur vitet e fundit. Eavis thekson se festivali mbetet larg komercializimit: “Do të preferoja të vdisja sesa ta shisja te korporatat”.

Michael Eavis, themeluesi i festivalit, ia ka kaluar drejtimin vajzës së tij Emily dhe do të festojë 90-vjetorin këtë tetor, për të cilin pritet një surprizë në skenë.