Prokuroria Speciale e Kosovës ka dorëzuar në Gjykatë Themelore kërkesën që kryeministri i vendit, Albin Kurti të paraqitet në Prokurorinë Speciale të Republikës së Kosovës për të dhënë dëshminë e tij në cilësinë e dëshmitarit lidhur me rastin e rezervave shtetërore.

Kjo është konfirmuar për lajmi.net nga zëdhënësja e Gjykatës Themelore në Prishtinë, Mirlinda Gashi.

Gashi pohoi se janë në shqyrtim të kërkesës që kanë pranuar tashmë nga Prokuroria Speciale.

“Konfirmojmë se Gjykata Themelore në Prishtinë – Departamenti Special ka pranuar kërkesën në fjalë nga Prokuroria Speciale e Republikës së Kosovës, e njëjta është duke u shqyrtuar nga gjykata”, konfirmoi Gashi.

Kryeministri Kurti është ftuar disa herë radhazi nga Prokuroria si dëshmitar që të jap versionin e tij në lidhje me rastin e rezervave shtetërore për të cilin të dyshuar janë afaristi Ridvan Muharremi dhe zyrtraët e tjerë të ministrisë si, Irfan Lipovica dhe Hafiz Gara.

Prokuroria e ftoi Kurtin tri herë radhazi  për intervistim, por i njëjti nuk u paraqit.

Madje ai kishte deklaruar se prokurorët duhet të shkojnë të intervistojnë atë në zyrën e kryeministrit, duke deklaruar se këtë praktik e kanë përdorur edhe më herët prokurorët./Lajmi.net/