Gjykata Kushtetuese e Republikës së Kosovës ka konfirmuar për lajmi.net, se deri më tani nuk ka pranuar asnjë koment lidhur me kërkesën e kryeministrit Albin Kurti ndaj dekretit të Presidentes Vjosa Osmani për shpërndarjen e Kuvendit.

Afati për dorëzimin e komenteve nga palët e interesit ka përfunduar dje, 11 mars 2026, dhe zyrtarët e Gjykatës theksuan se procesi i shqyrtimit të kësaj lënde vazhdon sipas procedurave ligjore. Ky lajm vjen pas vendimit të Gjykatës për të caktuar një masë të përkohshme më 9 mars, e cila ka pezulluar çdo veprim të Presidentes dhe Kuvendit lidhur me Dekretin nr. 24/2026 të datës 6 mars 2026.

“Deri më tani, në Gjykatë nuk është dorëzuar ndonjë koment lidhur me kërkesën e kryeministrit”, thuhet në përgjigjen e gjykatës për lajmi.net.

Përmes këtij vendimi, Gjykata ka ndaluar çdo veprim në kuadër të dekretit për shpërndarjen e Kuvendit deri në vendimin përfundimtar, duke siguruar që çështja të shqyrtohet në mënyrë të drejtë dhe të plotë. Masa e përkohshme do të mbetet në fuqi deri më 31 mars 2026.

Kësisoj mos dorëzimi i ndonjë komenti nga palët e interesit, nënkupton se asnjë reagim shtesë nuk do të ndikojë në procedurat e tanishme të shqyrtimit.

Ky proces ligjor është pjesë e kërkesës së kryeministrit Kurti, i cili ka kërkuar nga Gjykata Kushtetuese të vendosë nëse dekreti i Presidentes është në përputhje me Kushtetutën e Republikës së Kosovës. Vendimi përfundimtar i Gjykatës pritet të sqarohet gjatë javëve të ardhshme, duke vendosur për të ardhmen e dekretit dhe rolit të Kuvendit në këtë situatë.

Për më tepër, Gjykata ka bërë të ditur se çdo veprim i mëtejshëm në lidhje me dekretin dhe Kuvendin do të monitorohet nga institucionet përkatëse në përputhje me masën e përkohshme. /Lajmi.net/