Gjykata Themelore në Prishtinë ia ka vazhduar edhe për dy muaj masën e paraburgimit Fatmir Shehollit, i cili dyshohet për kryerjen e veprës penale të spiunazhit në vazhdimësi.

Kështu ka konfirmuar për lajmi.net zëdhënësja e Gjykatës Themelore në Prishtinë, Mirlinda Gashi, e cila bëri të ditur se vendimi është marrë pas kërkesës së Prokurorisë Speciale të Republikës së Kosovës (PSRK).

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale ndaj të pandehurit F.SH., për shkak të dyshimit të bazuar se ka kryer veprën penale të Spiunazhit në vazhdimësi, gjyqtarja e procedurës paraprake pas shqyrtimit të kërkesës, përmes Aktvendimit ka aprovuar kërkesën e PSRK-së, ashtu që të njëjtit i është vazhduar masa e paraburgimit në kohëzgjatje prej 2 (dy) muaj”, ka deklaruar Gashi për lajmi.net.

Sheholli u arrestua më 9 tetor të vitit të kaluar në një aksion të autoriteteve të sigurisë, nën dyshimin për veprën penale të spiunazhit. Pas arrestimit të tij, Gjykata kishte caktuar masën e paraburgimit, e cila është vazhduar edhe në disa raste gjatë zhvillimit të procedurës penale.

Prokuroria Speciale e Republikës së Kosovës po e heton rastin, ndërsa autoritetet nuk kanë bërë publike detaje të tjera lidhur me hetimet, për shkak të ndjeshmërisë së çështjes. /Lajmi.net/