Kryetari i Aleancës, Ardian Gjini, ka reaguar pas publikimit të raportit të fundit të Institutit Kombëtar Demokratik (NDI), duke e cilësuar atë si një alarm për gjendjen në Kosovë dhe një dëshmi të nevojës për ndryshim politik.

Përmes një reagimi publik, Gjini tha se rritja e numrit të qytetarëve që besojnë se vendi po shkon në drejtim të gabuar, si dhe shtimi i atyre që dëshirojnë të largohen nga Kosova, janë sinjale shqetësuese që kërkojnë veprime konkrete.

Sipas tij, shqetësimet kryesore të qytetarëve lidhen me rritjen e çmimeve, faturat e energjisë elektrike, mungesën e vendeve të punës dhe korrupsionin, probleme që, siç tha ai, po ndikojnë drejtpërdrejt në jetën e përditshme të familjeve kosovare.

“Pikërisht këto shifra dhe ky realitet që e prekim çdo ditë në terren me qytetarët janë arsyeja pse jemi të vendosur për ofertën tonë me gjashtë pika, si rrugëdaljen strategjike për Kosovën”, ka shkruar Gjini.

Ai ka bërë të ditur se oferta e Aleancës përfshin investime në gazin amerikan dhe ndërtimin e një termocentrali të ri për rritjen e sigurisë energjetike, si dhe masa për lehtësimin e barrës financiare për qytetarët dhe bizneset.

Gjini përmendi gjithashtu uljen e TVSH-së për ushqimet dhe produktet e higjienës për gratë dhe fëmijët, heqjen e tatimit në pronë për tokën e punuar, si dhe rritjen e pragut të TVSH-së për bizneset deri në 100 mijë euro.

Në fund, kreu i Aleancës theksoi se Kosovës i nevojitet një kthesë e madhe politike që, sipas tij, do të ndalë keqmenaxhimin, do të zhvillojë ekonominë dhe do të krijojë kushte që qytetarët të ndërtojnë të ardhmen e tyre në vend. /Lajmi.net/