Presidenti i Agjencisë Federale për Mbrojtjen Civile dhe Ndihmën në Fatkeqësi (BBK), Ralph Tiesler, tha se janë të shqetësuar për rrezikun e një lufte të madhe në Evropë.

Në një intervistë për gazetën gjermane Sueddeutsche Zeitung, Tiesler tha se rrjeti i vjetruar i bunkerëve të Gjermanisë ka nevojë për një riorganizim të madh.

“Për një kohë të gjatë, në Gjermani ekzistonte një besim i përhapur se lufta nuk ishte një skenar për të cilin duhej të përgatiteshim. Kjo ka ndryshuar. Ne jemi të shqetësuar për rrezikun e një lufte të madhe agresioni në Evropë,” tha ai.

Fjalët e Tiesler përfaqësojnë një frikë të vërtetë në të gjithë Evropën, se Rusia mund të përpiqet të kryejë një sulm ndaj Evropës brenda katër vjetësh. Ky afat kohor konsiderohet gjerësisht si periudha minimale që Rusia do të duhej të riarmatosej pas një fushate të përgjakshme dhe të gjatë në Ukrainë.

Gjermania ka vetëm 580 bunkerë, shumë prej të cilëve nuk janë funksionalë. Ky numër është më i ulët nga gati 2 mijë që ekzistonin gjatë Luftës së Ftohtë. Vetëm pesë për qind e popullsisë gjermane aktualisht do të ishte në gjendje të kërkonte strehim në rast të një sulmi. Popullsia e Gjermanisë është rreth 83 milionë njerëz.

Shefi i agjencisë së mbrojtjes civile tha se do të përmirësojë tunelet, stacionet e metrosë, garazhet nëntokësore dhe bodrumet e ndërtesave publike për të “krijuar shpejt një milion hapësira strehimi”, si dhe për të zgjeruar sistemet e sirenave dhe njoftimit të vendit.

Tiesler vuri në dukje se ka të ngjarë të nevojiten 10 miliardë euro në katër vjetët e ardhshëm dhe 30 miliardë euro të tjera në dhjetë vjetët e ardhshme për të përfunduar riparimin, raporton KosovaPress.

Kancelari Merz kohët e fundit u zotua ta bënte ushtrinë e Gjermanisë më të fortën në Evropë, por për ta përmbushur këtë premtim ai do të duhet të shpenzojë shuma të mëdha parash.

Madhësia aktuale e përhershme e ushtrisë gjermane është vetëm 181 mijë dhe Qeveria Merz po shqyrton futjen e shërbimit të detyrueshëm ushtarak.