Gjykata Rajonale e Itzehoes në Gjermani ka dënuar me burgim të përjetshëm prindërit e foshnjës katërmuajshe Ashley, pasi i shpalli fajtorë për vrasje me mosveprim dhe keqtrajtim të rëndë të një fëmije nën kujdesin e tyre.

Sipas vendimit të gjykatës, prindërit për një periudhë të gjatë nuk i siguruan vajzës ushqim dhe lëngje të mjaftueshme, duke shkaktuar kequshqyerje të rëndë që përfundoi me vdekjen e saj. Mediat gjermane raportojnë se gjykata e konsideroi rastin si një nga më tronditësit e viteve të fundit, transmeton lajmi.net.

Kryetari i trupit gjykues, Johann Lohmann, deklaroi se bëhej fjalë për një rast që “të lë pa fjalë”, duke theksuar se provat dëshmuan një neglizhencë të skajshme nga ana e të dy prindërve.

Ashley kishte lindur në maj të vitit 2025 dhe ndërroi jetë katër muaj më vonë, pasi kishte kaluar një periudhë të gjatë pa ushqim të mjaftueshëm. Në kohën e vdekjes, foshnja peshonte vetëm rreth një kilogram, ndërsa autopsia konfirmoi se shkaku ishte uria e shkaktuar nga kequshqyerja e rëndë.

Prokuroria argumentoi se prindërit ishin të vetëdijshëm se mungesa e ushqimit dhe e lëngjeve e vinte në rrezik jetën e vajzës, por nuk ndërmorën veprime për ta parandaluar tragjedinë.

Më 26 shtator 2025, çifti njoftoi shërbimet e emergjencës dhe policinë në banesën e tyre në Brunsbüttel. Megjithatë, kur ekipi mjekësor mbërriti në vendngjarje, vetëm konstatoi vdekjen e foshnjës.

Një ditë më pas, të dy prindërit, atëherë 24-vjeçarë, u arrestuan dhe qëndruan në paraburgim deri në përfundimin e procesit gjyqësor.

Gjatë gjykimit, ata deklaruan se ishin ndier të mbingarkuar nga përgjegjësitë për kujdesin ndaj fëmijëve.

Babai tha se nuk kujtonte shumë nga ngjarjet para vdekjes së vajzës, duke përmendur probleme psikologjike dhe mungesë mbështetjeje.

Nga ana tjetër, nëna pranoi se kishte vërejtur rënien drastike në peshë të foshnjës rreth dy javë para vdekjes, por vizitat e planifikuara te mjeku nuk ishin realizuar.

Gjykata nuk i pranoi këto shpjegime dhe i hodhi poshtë si të pabazuara./lajmi.net/