Një person është gjetur pa shenja jete të mërkurën paradite në fshatin Serbicë e Ulët të Prizrenit.

Sipas Policisë së Kosovës, rasti është raportuar sot, më 17 dhjetor 2025, rreth orës 11:35, kur autoritetet janë njoftuar se në fushën e këtij fshati është vërejtur një person i shtrirë pa shenja jete.

Njësitet policore, bashkë me ekipin e emergjencës mjekësore, kanë dalë menjëherë në vendin e ngjarjes, ku mjekët kanë konstatuar vdekjen e personit.

Viktima është identifikuar si M.K., 57 vjeçar, mashkull, nga fshati Serbicë e Ulët.

Zëdhënësi i Policisë për rajonin e Prizrenit, Shaqir Bytyqi, e ka konfirmuar rastin për lajmi.net, duke bërë të ditur se nga shikimi fillestar është vërejtur një plagë e shkaktuar nga arma e zjarrit në trupin e viktimës.

“Gjatë ekzaminimit fillestar në vendin e ngjarjes, është vërejtur se viktima kishte një plagë të shkaktuar nga arma e zjarrit, ndërsa në afërsi të trupit është gjetur edhe një armë zjarri – pistoletë”, ka deklaruar Bytyqi.

Ai shtoi se policia ndodhet ende në vendin e ngjarjes dhe është duke mbledhur informacione, prova materiale dhe dëshmi relevante që do të ndihmojnë në zbardhjen e plotë të rrethanave të këtij rasti.

Prokurori kompetent është njoftuar për rastin dhe, në koordinim me Policinë e Kosovës, po udhëheq veprimet e mëtejme procedurale.

Hetimet janë në vazhdim, ndërsa autoritetet nuk kanë dhënë ende detaje shtesë lidhur me motivet apo rrethanat që kanë çuar deri te kjo ngjarje e rëndë. /Lajmi.net/