Gërmimet në Dubravë, Hoti: Nuk kemi nevojë për glorifikim, familjaret nuk i njoftojmë për gërmime por për gjetje

Lajme

29/05/2025 16:05

Kryesuesi i Komisionit Qeveritar për Persona të Zhdukur, Andin Hoti ka reaguar ndaj raportimeve mbi gërmimet në Burgun e Dubravës, duke theksuar se në mënyrën si po prezantohen ato janë të papranueshme dhe shqetësuese, jo për shkak të përmbajtjes, por për mënyrën e trajtimit dhe shqetësimit të panevojshëm që po u bëhet këtyre rasteve.

Si autoritet shtetëror përgjegjës për çështjen e personave të zhdukur, dua të theksoj me përgjegjësi të plotë se ne nuk kemi nevojë për glorifikim mediatik, kemi nevojë për rezultate konkrete, ka theksuar Hoti në Facebook.

Familjet e personave të zhdukur nuk kanë nevojë të tronditen dhjetëra herë nga tituj bombastikë, por të informohen saktësisht dhe në kohë, vetëm kur ka të dhëna të verifikuara, ka porositur Hoti.

Hoti kujton se Kosova ka ndërmarrë mbi dy mijë e tetë qind gërmime në lokacione të ndryshme gjatë viteve në kërkim të të zhdukurve.

“Ky është një proces serioz, i ndjeshëm dhe i dhimbshëm për familjarët, ndaj është e papranueshme që të krijohen ankth dhe pritshmëri të pa përfunduar ende procesi i gërmimit. Ne si Komision nuk i njoftojmë familjet dhe opinionin publik para se të kemi gjetje konkrete, sepse gërmimi i një lokacioni nuk është lajm, gjetja është. Prandaj, kërkoj mirëkuptim të plotë nga mediat që në raste të tilla të shmangin publikime të parakohshme e sensacionaliste që cenojnë dinjitetin e familjeve dhe procesin”, ka shkruar Hoti.

Ai u bën thirrje të gjitha institucioneve relevante, qytetarëve dhe mediave të ndalojnë praktikën e përhapjes së panikut dhe të presin informimin zyrtar nga Komisioni Qeveritar për Persona të Zhdukur.

Reagimi i Hotit:

Reagim për media!

Lajmet e sotit që po qarkullojnë në media lidhur me gërmimet në Burgun e Dubravës, në mënyrën si po prezantohen, janë të papranueshme dhe thellësisht shqetësuese – jo për shkak të përmbajtjes së tyre, por për mënyrën e trajtimit publik dhe shqetësimit të panevojshëm që po u bëhet këtyre rasteve.

Në cilësinë e Kryesuesit të Komisionit Qeveritar për Persona të Zhdukur, si autoritet shtetëror përgjegjës për çështjen e personave të zhdukur, dua të theksoj me përgjegjësi të plotë se ne nuk kemi nevojë për glorifikim mediatik, kemi nevojë për rezultate konkrete.

Familjet e personave të zhdukur nuk kanë nevojë të tronditen dhjetëra herë nga tituj bombastikë, por të informohen saktësisht dhe në kohë, vetëm kur ka të dhëna të verifikuara.

Kosova ka ndërmarrë mbi 2,800 gërmime në lokacione të ndryshme gjatë viteve në kërkim të të zhdukurve. Ky është një proces serioz, i ndjeshëm dhe i dhimbshëm për familjarët, ndaj është e papranueshme që të krijohen ankth dhe pritshmëri të pa përfunduar ende procesi i gërmimit.

Ne si Komision nuk i njoftojmë familjet dhe opinionin publik para se të kemi gjetje konkrete, sepse gërmimi i një lokacioni nuk është lajm, gjetja është.

Prandaj, kërkoj mirëkuptim të plotë nga mediat që në raste të tilla të shmangin publikime të parakohshme e sensacionaliste që cenojnë dinjitetin e familjeve dhe procesin.

I bëj thirrje të gjitha institucioneve relevante, qytetarëve dhe mediave të ndalojnë praktikën e përhapjes së panikut dhe të presin informimin zyrtar nga Komisioni Qeveritar për Persona të Zhdukur.

Siç është theksuar në një prononcim për media sot, nga Udhëheqësi i Njësisë së Komisionit z. Gara, ky është lokacioni i dhjetë i trajtuar në kuptim të gërmimit vlerësues vetëm gjatë këtij viti.

Vetëm përmes kanaleve zyrtare të Komisionit, do të jepen informatat e verifikuara, dhe vetëm ashtu do të ruajmë besimin, seriozitetin dhe dinjitetin e kësaj çështjeje kaq të ndjeshme për shoqërinë tonë./Lajmi.net/