Ai ka deklaruar se kjo forcë ka bërë gati plane të detajuara për ta zbatuar çdo vendim të institucioneve qendrore.

Në një intervistë për “Epokën e re”, Kastrati thotë se shndërrimi i FSK-së në Forca të Armatosura nuk duhet ta trembë askënd, sepse synimi i kësaj force është stabiliteti dhe paqja në rajon.

“FSK’-ja është plotësisht e gatshme dhe e përgatitur për ta filluar implementimin e vendimeve, pra i ka bërë të gjitha përgatitjet për ta filluar procesin e themelimit të forcës së ardhshme në përputhje me planet dhe rekomandimet përfundimtare të aprovuara nga institucionet përgjegjëse”, ka thënë ai.

Lidhur me reagimin e Serbisë për themelimin e Forcave të Armatosura, Kastrati ka vlerësuar se askush nga fqinjët nuk duhet të ketë drojë, sepse synimi i kësaj force është të gjenerojë stabilitet, paqe dhe siguri në rajon. Madje ai ka shtuar se FSK-ja tashmë ka zhvilluar dhe ka përforcuar bashkëpunimin me vendet fqinje si: Shqipëria, Mali i Zi, Maqedonia si dhe vendet e tjera të rajonit me të cilat ka plane të përbashkëta stërvitje dhe mbështetje.

“Synimi ynë për t’u bërë pjesë e NATO-s, për të gjeneruar stabilitet dhe siguri ngushtë me ushtritë e vendeve të rajonit dhe më gjerë, janë dhe do të mbeten prioritetet tona”.

“Nuk shoh arsye për të pasur ndrojtje ndokush nga fqinjët tanë nga themelimi i një force të ardhshme të bazuar në këto parime”, është shprehur Kastrati në “Epoka e re”.