John Stones ka shqetësuar Interin pas paraqitjes së tij të parë si titullar, pasi mbrojtësi anglez u detyrua të largohej nga fusha në fitoren 5-3 ndaj Udineses.

Stones, i cili u aktivizua nga minuta e parë për herë të parë këtë sezon, u ndal pas një sprinti teksa po ndiqte sulmuesin e Udineses, Keinan Davis. Ai sinjalizoi menjëherë në drejtim të bankinës se nuk mund ta vazhdonte ndeshjen dhe u zëvendësua në minutën e 62-të.

Trajneri i Interit, Cristian Chivu, konfirmoi pas ndeshjes se Stones “ndjeu diçka në përkulësin e kofshës”, ndërsa shkalla e dëmtimit pritet të përcaktohet pas ekzaminimeve mjekësore.

Dëmtimi vjen në një moment të pafavorshëm për Interin, pasi kampionët e Italisë të shtunën përballen me Romën në një duel mes dy skuadrave që kanë nga 12 pikë pas katër xhirove.

Stones, 32-vjeçar, iu bashkua Interit si lojtar i lirë gjatë verës pas përfundimit të kontratës me Manchester Cityn. Ndeshja ndaj Udineses ishte paraqitja e tij e katërt me fanellën zikaltër dhe e para si titullar.

Interi ka edhe një shqetësim tjetër, pasi Hakan Calhanoglu mungoi ndaj Udineses për shkak të një problemi në muskujt aduktorë dhe gjithashtu është në dyshim për sfidën ndaj Romës.