Filmi “Pa vend” i regjisorit Samir Karahoda është bërë filmi i parë nga Kosova që është përzgjedhur në mesin e 10 filmave të shkurtë në garë për “Palmën e Artë”, në festivalin e Kanës, shkruan lajmi.net.

Filmi sjell rrëfimin e klubit më të suksesshëm të ping pongut nga Prizreni ‘Lidhja e Prizrenit’ duke rikrijuar historinë e protagonistëve nga paslufta në kontekstin e situatës së sotme.

Filmi i zhanrit docu-fiction përcjell përpjekjet e vazhdueshme të Jetonit dhe Ermeganit të udhëhequr nga trajneri i tyre Rifati që të mbajnë sportin e ping pongut gjallë duke zhvilluar gjenerata të reja të ping pongistëve.

Producent i filmit është Eroll Bilibani, ndërsa protagonistët kryesorë janë Jeton Mazreku, Ermegan Kazazi dhe Rifat Rifati.

Filmi është produksion i shtëpisë filmike SK PICTURES dhe është mbështetur nga: Qendra Kinematografike e Kosovës, Komuna e Prishtinës, Komuna e Prizrenit, Mabetex Group, TV Arte, TV Yle, Dokufest dhe distribuohet nga Radiator IP Sales. /Lajmi.net/