Njësia e Komunikacionit Rrugor e Policisë Rajonale në Ferizaj ka ndaluar një drejtues automjeti që po qarkullonte me shpejtësi dukshëm mbi kufirin e lejuar në rrugën magjistrale në fshatin Prelez i Muhaxherëve.

Sipas njoftimit të Policisë, rreth orës 05:00 është ndaluar një veturë e tipit BMW 318 me targa të huaja. Gjatë kontrollit, është konstatuar se drejtuesi i saj, H.S., 37 vjeç, po lëvizte me 111 kilometra në orë në një zonë ku shpejtësia maksimale e lejuar është 50 km/h.

Shpejtësia është matur me radar laserik, ndërsa ndaj shoferit janë shqiptuar këto masa ndëshkuese:

Gjobë në vlerë prej 300 euro;

3 pikë negative në patentë-shofer;

Ndalim i drejtimit të mjetit motorik për tre muaj.

Policia Rajonale e Ferizajt ka bërë të ditur se do të vazhdojë kontrollet dhe aktivitetet e shtuara në komunikacion, me synim rritjen e sigurisë rrugore dhe zbatimin e rregullave të trafikut.

Njëkohësisht, qytetarët janë ftuar të bashkëpunojnë me Policinë e Kosovës, duke raportuar shkeljet e trafikut përmes linjave zyrtare ose aplikacionit “Lajmëro Policinë”. /Lajmi.net/