Nëpërmjet kësaj kërkese drejtuar KGJK-së, përkatësisht kreut të saj Enver Peci, babai i Diana Kastratit ka kërkuar anulimin e vendimit për përzgjedhjen e gjyqtarit Enver Shabanaj në Gjykatën Themelore të Prishtinës.

“Ne prindërit e të ndjerës Diana Kastrati po ju drejtohemi me këtë kërkesë, ku kërkojmë anulimin e vendimit me të cilin i keni propozuar presidentes së Kosovës që të dekretojë Enver Shabanajn gjyqtar në Gjykatën Themelore në Prishtinë”.

“Propozimi prej KGJK-së që të dekretohet Enver Shabanaj në postin e gjyqtarit të Gjykatës Themelore në Prishtinë është një shkelje e radhës që po na bëhet neve si familje, që kemi humbur bijën tonë për shkak të dështimit të shtetit që të ofrojë mbrojtje efektive juridike për qytetarët e Kosovës”, thuhet në letrën që familja i ka dërguar Pecit, shkruan “Kosovasot”.