Pas incidentit me zjarr që përfshiu një banesë në rrugën “Isa Kastrati”, afër Parkut të Qytetit në Prishtinë, ka reaguar edhe kryetari i Komunës, Përparim Rama.

Rama ka dalë në vendin e ngjarjes për të parë nga afër situatën dhe ka shprehur mirënjohjen për ekipet që ndërhynë në kohë, duke parandaluar përhapjen e mëtejshme të zjarrit, raporton lajmi.net.

Në një postim në Facebook, ai ka shkruar:

“Falë reagimit të menjëhershëm dhe profesional të zjarrfikësve, zjarri në ndërtesën në rrugën ‘Isa Kastrati’ – u lokalizua në kohë, duke shmangur përhapjen dhe dëmet e mëdha.
Dola për të parë nga afër situatën dhe për të shprehur falënderimet për ekipin e zjarrfikësve dhe Drejtorinë për Siguri dhe Emergjenca për koordinimin efikas dhe përkushtimin në mbrojtje të sigurisë publike.”

Zjarri shpërtheu mbrëmjen e së martës dhe përfshiu katin e fundit të një ndërtese banimi. Sipas Policisë, nuk është raportuar për persona të lënduar, ndërkohë që hetimet mbi shkaqet e zjarrit janë duke vazhduar./Lajmi.net/