16 vite më parë Qeveria e Kosovës kishte marrë vendim për largimin e njeriut kryesor të Doganës së Kosovës.

Rasti i futjes së maunave me vaj disulfurik dhe gjetjet e Zyrës së Auditorit Gjeneral për keqpërdorime në Shërbimin Doganor të Kosovës kishin çuar drejt suspendimit të drejtuesit të këtij institucioni, Naim Huruglica.

Këtë vendim e mori ministri i Ekonomisë dhe Financave, Ahmet Shala, disa orë pasi kryeministri i vendit asokohe, Hashim Thaçi në mbledhjen e rregullt të qeverisë kishte kërkuar ndëshkim ndaj atyre që kanë lejuar futjen e maunave në Kosovë.

Bazuar në një njoftim zyrtar të MEF-it Qeveria e Republikës së Kosovës, në mbledhjen e së hënës , ka kërkuar nga udhëheqësit e MEF-it dhe të Ministrisë së Ambientit dhe Planifikimit Hapësinor (MAPH), që të marrë masa adekuate ligjore dhe disiplinore ndaj personave përgjegjës në ShDK-së dhe personave përgjegjës në MAPH, të cilët kanë bërë lëshime me rastin e importit të materieve të rrezikshme dhe kanë treguar papërgjegjshmëri ligjore rreth trajtimit të kësaj çështjeje.

“Duke u bazuar në kërkesën e Qeverisë , në bazë të përgjegjësive që ka Drejtori i Shërbimit Doganor ndaj këtij rasti, si dhe të gjetjeve të Zyrës së Auditorit Gjeneral të cilat janë të publikuara në raportin e fundit, e të cilat flasin për një numër të konsiderueshëm të shkeljeve dhe parregullsive në këtë shërbim, Ministri i MEF-it në bazë të kompetencave të përcaktuara me ligj, merr vendimin që të suspendojë përkohësisht nga posti i Drejtorit të Doganave, Naim Huruglica”.

E është pikërisht ky njeri që dikur rrezikoi vendin që së fundi u “shpërblye” nga Qeveria e Kosovës, saktësisht nga Ministria e Bujqësisë.

Ministri i Bujqësisë Faton Peci i dha grant edhe këshilltarit të jashtëm në kabinetin e ministrit, Naim Huruglica.

Kompania e quajtur “Iron Consulting” është nën drejtimin e Huruglicës, e që u shpërblye me grant në vlerë 100 mijë euro.

100 mijë euro grant për projektin e këshilltarit të ministrit Peci, Naim Huruglica.

Naim Huruglica i cili tani mban pozitën e këshilltarit të jashtëm të ministrit Peci, dikur ishte larguar nga udhëheqja e Doganës së Kosovës.

Madje asokohe saktësisht në vitin 2008 në vendin tonë ishin organizuar edhe protesta. Në Mitrovicë ishte protestuar në lidhej me vajin disulfurik që kishte lejuar të f utet në Kosovë vetë Huruglica.

Protestuesit thonin se kjo materie është helmuese dhe se shkaktonte pasoja në shëndetin e banorëve si dhe se dëmtonte florën e faunën.

Pas kësaj, ministria ishte dashur që të shpallte tender për përzgjedhjen e një kompanie të caktuar, që do të bënte asgjësimin e vajit disulfurik.

Materia, me mbi 50 tonë vaj disulfurik kishte ardhur nga Irani dhe bënte pjesë në mesin e gazrave helmuese.

Naim Huruglica kishte arritur madje që përsëri të kthehej në punë, e pas sa vitesh edhe të shpërblehet me grant./Lajmi.net