Presidenti amerikan, Donald Trump, ka urdhëruar hetime ndaj ish bashkëpunëtorit të tij, Richard Grenell, lidhur me dyshimet për një marrëveshje financiare që përfshinte premtime për qasje te presidenti dhe zyrtarët e lartë amerikanë.

Sipas një raportimi të mediumit amerikan Axios, të publikuar më 19 tetor, në qendër të hetimeve është një mesazh i pretenduar i Grenellit drejtuar biznesmenit turk, Turhan Mildon, më 3 maj 2025.

Në mesazh pretendohet se Grenell i kishte ofruar biznesmenit mundësi pjesëmarrjeje në ngjarje ekskluzive dhe afrimitet me administratën amerikane, përfshirë presidentin Trump, në këmbim të një donacioni për qendrën kulturore Kennedy Center.

Grenell, i cili në atë periudhë drejtonte këtë institucion, ka mohuar akuzat dhe ka kundërshtuar autenticitetin e mesazhit.

Sipas Axios, Mildon pretendon se, me udhëzimin e Grenellit, ishin transferuar 17.6 milionë dollarë te kompania amerikane Texas Armament & Technology, me seli në Hjuston.

Nga kjo shumë, rreth 5.6 milionë dollarë pretendohet se ishin të destinuara për Kennedy Center. Megjithatë, sipas pretendimeve të paraqitura në Shtëpinë e Bardhë, institucioni nuk e kishte pranuar donacionin.

Rasti u ngrit para presidentit Trump nga Alina Habba, ish-avokate e tij dhe bashkëshortja e biznesmenit Mildon.

Habba kishte shkuar në Shtëpinë e Bardhë më 9 tetor, ku kishte paraqitur pretendimet ndaj Grenellit.

Pas kësaj, Trump i kishte kërkuar këshilltarit juridik të Shtëpisë së Bardhë, Will Scharf, të shqyrtonte akuzat dhe dokumentacionin përkatës.

Sipas raportimit, dokumentet e dorëzuara përfshijnë mesazhe dhe të dhëna financiare që po verifikohen nga zyra juridike e Shtëpisë së Bardhë.

Një zyrtar amerikan ka bërë të ditur se transferimi prej 17.6 milionë dollarësh rezulton të jetë kryer nga Ministria e Financave e Republikës Demokratike të Kongos, dhe jo drejtpërdrejt nga llogaria bankare e Mildonit.

Kjo ka ngritur pyetje shtesë për origjinën e parave dhe natyrën e marrëveshjes financiare.

Ndërkohë, Grenell i ka cilësuar pretendimet si të pavërteta, duke mohuar se kishte kërkuar transferimin e parave në ndonjë kompani private në emër të Kennedy Center.

Ai ka mohuar gjithashtu se kishte marrë pagesa nga biznesmeni turk.

Axios raporton se hetimet janë ende në fazën e mbledhjes dhe verifikimit të provave. Deri më tani, nuk është vërtetuar se Grenell ka kryer ndonjë shkelje.

Richard Grenell është i njohur edhe për angazhimin e tij në Ballkan. Ai kishte shërbyer si emisar special i presidentit Trump për dialogun ndërmjet Kosovës dhe Serbisë gjatë mandatit të parë presidencial.

Grenell kishte luajtur rol në procesin që çoi te nënshkrimi i marrëveshjeve të Uashingtonit, më 4 shtator 2020, për normalizimin ekonomik ndërmjet Kosovës dhe Serbisë.

https://www.axios.com/2026/10/19/kennedy-center-text-trump-grenell-habba