Ministrja e Serbisë për Administratë Shtetërore dhe Vetëqeverisje Lokale të Serbisë, Snezhana Paunoviq, dje ka bërë një deklaratë skandaloze ku ka thënë se, po të kishte qenë në vend të ish-presidentit serb Sllobodan Millosheviq në vitin 1998, do të kishte kryer spastrim etnik në Kosovë.

Në lidhje me këtë, kanë reaguar edhe nga Qeveria e Kosovës.

Zëdhënësi i Qeverisë, Arlind Manxhuka ka thënë se problemi qëndron se shteti i Serbisë nuk ka bërë asnjë lloj distancimi nga politika e Millosheviqit.

” Për më tepër, vetë Presidenti i këtij shteti ka qenë ministër i tij, ndërkohë që hiç më të mira nuk janë as deklarimet e as sjelljet e tij karshi Republikës së Kosovës. Në këtë atmosferë janë edhe deklarimet e tilla si kjo e fundit e ministres, që tha se po të ishte në pozitën e Millosheviqit do ta spastronte etnikisht Kosovën”, ka shkruar Manxhuka.

Ai ka thënë se ndërkohë që Millosheviqi bëri spastrim etnik në Kosovë, për pothuajse 27 vite elitat në Serbi kanë vazhduar me mendësi të njëjtë, të përshtatur me rrethanat e reja.

“Ju e keni parë së fundmi kur Vuçiq, Presidenti i Serbisë, tha se Radojçiq nuk është kriminel, ndërkohë që ai ishte prijës i përpjekjes terroriste në shtator 2023 për aneksimin e veriut të vendit tonë. Ndërsa, për vite me radhë, shteti i Serbisë në Luginën e Preshevës po kryen spastrim etnik administrativ ndaj shqiptarëve. Ne jemi shumë të vetëdijshëm se me kë kemi të bëjmë, ndërkohë është mirë që të gjithë, përveçse ta dënojnë këtë gjuhë, ta kenë në mendje kur flasin me Serbinë për integrim, reforma dhe fonde, si dhe ta kuptojmë që këto nuk janë thjesht deklarime, por aspirata nga të cilat shteti zyrtar i Serbisë nuk ka hequr dorë”, ka shkruar Manxhuka. /Lajmi.net/ 

Postimi i plotë: