Rrjeti pro-rus në Serbi, BBC: Organizatat e lidhura me Kremlinin e qeverinë serbe, po përhapin propagandë dhe ndikim

Mesazhet për “vëllazërinë” serbo-ruse vazhdojnë të jenë të pranishme në Serbi përmes mediave, deklaratave politike dhe aktiviteteve të organizatave të ndryshme që promovojnë lidhjet mes dy vendeve.

Sipas të dhënave të Agjencisë për Regjistrat e Bizneseve në Serbi, në vend veprojnë dhjetëra shoqata serbo-ruse, disa prej të cilave bashkëpunojnë me organizata ruse të vendosura nën sanksione të Bashkimit Evropian, si fondacioni “Pravfond”.

Bashkimi Evropian e akuzon Pravfondin për përhapje të propagandës ruse dhe forcim të narrativave të Kremlinit, përfshirë pretendimet për “nazifikimin” e Ukrainës dhe “rusofobinë” në shtetet fqinje. Autoritetet ruse i kanë mohuar këto akuza, duke thënë se fondi ndihmon qytetarët rusë jashtë vendit.

Serbia mbetet një nga vendet e rralla në Evropë që nuk ka vendosur sanksione ndaj Rusisë pas pushtimit të Ukrainës në vitin 2022, megjithëse raportet mes Moskës dhe Beogradit janë tensionuar për shkak të eksportit të armëve serbe drejt Ukrainës dhe çështjes së kompanisë së naftës NIS.

Analistët vlerësojnë se Rusia e përdor Serbinë për të ruajtur ndikimin e saj në Ballkan dhe për të penguar zgjerimin e Bashkimit Evropian në rajon.

Srdjan Cvijic nga Qendra e Beogradit për Politikë të Sigurisë deklaroi se organizatat serbo-ruse shërbejnë për të zgjeruar ndikimin rus në gjithë shoqërinë serbe dhe jo vetëm në nivel politik, shkruan BBC.

Ndërkohë, fondacione si “Pravfond” dhe “Russki Mir” kanë mbështetur projekte mediatike, aktivitete kulturore dhe ngjarje publike në Serbi, ku janë promovuar narrativa pro-ruse dhe kundërshtimi ndaj Perëndimit.