Deputetja e zgjedhur e Lidhjes Demokratike të Kosovës (LDK), Janina Ymeri, ka akuzuar kryeministrin në detyrë, Albin Kurti, se po e vonon me qëllim procesin e konstituimit të institucioneve, me synimin që vendi të shkojë në zgjedhje të reja në fund të vitit.

Përmes një postimi në rrjetet sociale, Ymeri ka deklaruar se Kurti i ka numrat për ta formuar Kuvendin dhe Qeverinë, por sipas saj, po zgjedh të mos e bëjë këtë për kalkulime politike.

“Albin Kurti mundet sot me i formu edhe Kuvendin edhe Qeverinë, por shtyrja e këtyre proceseve po bëhet ashtuqë zgjedhjet e reja, për çdo rast, të bëhen në dhjetor”, ka shkruar ajo.

Ymeri i është drejtuar më pas personalisht kryeministrit në detyrë, duke iu referuar edhe mbështetjes së mërgatës, ndërsa ka përdorur një krahasim me personazhin satirik “Shoku Zylo”.

“Shoku Kryeministër, me e pa mërgatë, rënia e shokut Zylo po bëhet dhe s’ke mundësi me ndal”, ka shkruar deputetja e zgjedhur e LDK-së.

Deklarata e saj vjen në kohën kur procesi i konstituimit të institucioneve të reja vazhdon të mbetet i bllokuar, ndërsa partitë politike ende nuk kanë arritur një marrëveshje për formimin e Kuvendit dhe Qeverisë. /Lajmi.net/