Kryetari i Komunës së Deçanit, Rasim Selmanaj, duke iu shprehur ngushëllime familjarëve të Beg Rizajt, tha ai dhe bashkëluftëtarët e tij të rënë janë dëshmorë të kombit.

“Rënia e Beg Rizës, bashkëvendësit tonë dhe njërit nga luftëtarët më të vendosur të ushtrisë sonë, të njësitit të ‘Shqiponjave të Zeza’, tregon se çështja e shqiptarëve ende nuk është zgjidhur”, tha Selmanaj.

Ndërkaq Hysni Shaqiri, njëri nga ish komandantët e UÇK-së në Maqedoni, tha se është i bindur se sot të gjithë janë me Deçanin, Dukagjinin dhe botën shqiptare.

“Ne po flasim për djemtë që gjithnjë kanë qenë me ideologji të frymëzuar për zgjidhjen e çështjes kombëtare, këtë nuk e them unë por e dëshmon vepra e tyre, ajo që u arrit më 9 maj nga Begu me shokë. Kumanova nuk është nën administrimin e Kosovës dhe Shqipërisë, por është tokë shqiptare dhe atë ditë këta patriotë kanë qenë duke luftuar në tokën e tyre”, tha Shaqiri.

Para se të mbahet tubimi mortor, për nder të Beg Rizajt janë bërë homazhe në Pallatin e Kulturës “Jusuf Gërvalla”, ndërkaq në orën 15 kortezhi me trupin e Begut do të niset nga Deçani për në varrezat e dëshmorëve në Gllogjan. /KosovaPress/