Adriano Galliani do të largohet nga Milani, pas 27 vjetësh pune në rol udhëheqës në klub.

Pavarësisht fitores 3:0 ndaj Celticut në Ligën e Kampionëve në mesjavë, nënkryetari legjendar i Rossonerëve ka njoftuar se do të tërhiqet nga detyra pas ndeshjes së fundit të fazës së grupeve kundër Ajaxit.

“Largohem, me ose pa marrëveshje të kompensimit. Jam i ofenduar, nuk bëhet kështu ndërrimi i gjeneratës, bëhet më me elegancë. Do të tërhiqem në ditët në vazhdim, ndoshta do të pres përfundimin e sfidës kundër Ajaxit. Por, nuk e ndërroj mendjen”, deklaroi Galliani për agjencinë italiane të lajmeve Ansa.

Mosmarrëveshjet mes Gallianit dhe Barbara Berlusconit, bijës së presidentit, Silvio Berlusconi, e cila kishte vënë në diskutim strategjinë e klubit, kanë bërë që zyrtari i mirënjohur t’i jap lamtumirën klubit.

“Kam pësuar një dëm të madh në imazhin tim. Respekti im për presidentin Berlusconi është i pandashëm. Nuk dua ta shqetësoj atë”, u shpreh Galliani.