Komisioni Qendror i Zgjedhjeve (KQZ) ka certifikuar rezultatet përfundimtare të zgjedhjeve të parakohshme për Kuvendin e Kosovës, të mbajtura më 28 dhjetor 2025. Vendimi u mor gjatë mbledhjes së 13-të për këtë vit, të kryesuar nga kryesuesi Kreshnik Radoniqi.

Sipas komunikatës zyrtare të KQZ-së, e publikuar edhe në Facebook, certifikimi përfshin 24 subjekte politike dhe kandidatët e tyre. Radoniqi bëri të ditur se PZAP dhe Gjykata Supreme kanë përfunduar trajtimin e të gjitha ankesave të parashtruara ndaj rezultateve të shpallura më 31 janar 2026, dhe nuk ka pasur ndryshime në rezultatet përfundimtare, shkruan lajmi.net.

Certifikimi vjen pasi procesi i numërimit dhe verifikimit të votave është kryer sipas standardeve ligjore dhe procedurave të përcaktuara për zgjedhjet në Kosovë. KQZ thekson se rezultati i certifikuar përfaqëson vullnetin e qytetarëve dhe shënon përfundimin e procesit zgjedhor për këtë cikël.

Ky hap është i rëndësishëm për fillimin e formimit të Kuvendit të ri dhe për zbatimin e mandatit të ardhshëm qeverisës, duke garantuar stabilitetin institucional dhe respektimin e procedurave demokratike. /Lajmi.net/