Burri vret gruan e tij 48-vjeçare në Llaushë të Skenderajt

Lajme

05/01/2022 16:15

Një plagosje me armë zjarri ka ndodhur sot në Skenderaj, ku si pasojë e plagëve të rënda ka humbur jetën një 48 vjeçare.

Pas kësaj nga Policia e Kosovës kanë bërë të ditur se kanë arrestuar një person të dyshimtë lidhur me këtë vrasje.

I arrestuarit në këtë rast është bashkëshorti i viktimës, S.Q, 51 vjeçar, transmeton lajmi.net.

Njoftimi i plotë:

Sot, rreth orës 13:40, policia në Skenderaj, ka pranuar informacion për një plagosje nga arma e zjarrit e ndodhur në fshati Llaushë të Skenderajt.
Me të pranuar informacionin, në vendin e ngjarjes me urgjencë kanë dalë të gjitha njësitet e nevojshme policore.

Nga hetimet fillestare nga vendi i ngjarjes bëhet e ditur se personi i dyshuar ka shtënë me armë zjarri në drejtim të viktimës (gruas së tij) L.Q., 48 vjeçare, e cila kishte pësuar lëndime të rënda, të njëjtën me urgjencë e kanë dërguar në spitalin rajonal në Mitrovicë. Ndërkohë nga autoritetet spitalore është raportuar se viktima si pasojë e plagëve kishte vdekur.

Lidhur me veprën penale është arrestuar një person i dyshuar, nga i njëjti është sekuestruar një armë e llojit Pistoletë me tre fishek, ndërsa në vendin e ngjarjes janë sekuestruar gjashtë (6) gëzhoja.

Pas intervistimit të dyshuarit S.Q,.51 vjeçar, i është caktuar masa e ndalimit policor. Trupi i pajetë i viktimës është dërguar për obduksion në IML.