Ka të atillë që kanë shënuar 37 gola në 38 ndeshje të Kampionatit në 14 muajt e fundit dhe nuk u është ofruar ende mundësia të bartin fanellën e ekipit Kombëtar.

Graziano Pelle, sulmuesi 28-vjeç me origjinë nga San Cesari në Lecce, pas transferimit në Holandë është shndërruar në ‘Hero të Rotterdamit”, qytet ku paraqitet me skuadrën e tij, Feyenoord.

Prej kur zbarkoi në Rotterdam, Pelle ka filluar të shënojë në vazhdimësi: 27 gola në 9 asistime në edicionin e kaluar të Eredivisie, 10 gola në 9 paraqitje këtë edicion përfshirë dy het-trika.

Koeman e adhuron – Trajneri Ronald Koeman e konsideron si një prej futbollistëve kryesor në ekipin e tij kurse tifozët e Feyenoordit kanë filluar të çmenden pas tij. Edhe pse Eredivisie mund të konsiderohet si nivel inferior ndaj Serie A, golat e tij i kanë rënë në sy shumëkujt. Por, ai vazhdon të injorohet nga selektori i Azzurrëve, Cesare Prandelli dhe ndonjë skuadër nga elita e futbollit italian.

Vështirësitë në Itali – Ndoshta për shkak të fillimit të vështirë të karrierës në Lecce, Catania, Cesena dhe Crotone (maksimumi 10 gola në Serie B me Cesenan), dhe aventurat e tjera te Parma dhe Sampdoria ku nuk bindi me paraqitjet e tij, por tani Pelle është një futbollist tjetër i cili po shkëlqen në Rotterdam ku konsiderohet idhull.