Ministrja e Kulturës dhe Turizmit, Saranda Bogujevci, ka pritur në takim ambasadorin e Italisë në Kosovë, Maurizio Antonini, ku është diskutuar për forcimin e bashkëpunimit ndërmjet dy vendeve në fushën e kulturës, trashëgimisë kulturore dhe turizmit.

Sipas njoftimit, në takim është folur për projektet aktuale dhe për mundësitë e zhvillimit të iniciativave të reja që synojnë avancimin e këtyre sektorëve me rëndësi për Kosovën.

Ministrja Bogujevci ka falënderuar ambasadorin Antonini për mbështetjen e vazhdueshme të Italisë në zhvillimin kulturor të Kosovës, duke vlerësuar rolin e bashkëpunimit ndërinstitucional.

Nga ana e tij, ambasadori italian ka uruar ministren për detyrën e re dhe ka rikonfirmuar gatishmërinë e Italisë për vazhdimin dhe zgjerimin e bashkëpunimit në fushat me interes të përbashkët.

Në fund të takimit, të dy palët janë pajtuar për thellimin e mëtejshëm të marrëdhënieve kulturore dhe turistike ndërmjet Kosovës dhe Italisë. /Lajmi.net/