“Bill Clinton” kërkon kontejnerë! (Foto)
Banorët e lagjes Dardania në Prishtinë, që banojnë në ndërtesat publike të cilat shtrihen në anën e djathtë të bulevardit “Bill Clinton” (në drejtim të kompleksit Santea), që prej gati pesë vjetësh janë të detyruar të bartin bërllokun në lagjen tjetër të qytetit, Lakërishte.
Lajme
Që kur është ndërtuar bulevardi nga Komuna, kontejnerët që ndodheshin në parkingun pranë ndërtesave publike, janë hequr prej aty, ndërsa pika më e afërt që banoret kanë për hedhjen e mbeturinave ditore kanë mbetur kontejnerët që ndodhen në lagjen Lakërishte, pikërisht në zonën ku po bëhen ndërtimet e rrokaqiejve.
Përveç rrezikut nga veturat që banorëve u kanoset derisa ata/ato kalojnë rrugën, ku shpejtësia e kufizuar është 40km/h, por që jo rrallë shkon në 80km/h, dërgimi i bërllokut deri tek kontejnerët më të afërt paraqet rrezik për qytetarët sidomos në kohën kur bie terri, pasi rrugica është e pandriçuar, përplot me baltë dhe qenë endacakë.
Derisa niveli i pastërtisë në hyrjet e Bllokut Nr.5 ka rënë shumë krahasuar me pesë vjet më parë, mungesa e kontejnerëve ka ulur dukshëm edhe numrin e qytetarëve që paguajnë me rregull faturat për “shërbimin” që kryen kompania e pastrimit.
Lajmi.net nuk ka kontaktuar as zyrtarët komunalë dhe as ata të kompanisë së pastrimit, pasi fotografitë e së dielës që sapo lamë pas flasin mjaftueshëm për “kujdesin” që këto institucione kanë ndaj qytetarëve dhe ambientit ku jetojnë.