Ylli i Real Madridit, Jude Bellingham, ka deklaruar për mediat se fjala që është dëgjuar më shumë në dhomën e zhveshjes në ditët e fundit është “remontada” (rikthim), pasi skuadra përgatitet për ndeshjen e dytë kundër Arsenalit në çerekfinalet e Ligës së Kampionëve, duke kërkuar një përmbysje të rezultatit prej 0-3.

“Remontada (qesh). Besoj se e kam dëgjuar një milion herë gjatë kësaj jave. Na motivon jashtë mase. Është një natë e krijuar për Real Madridin. Nuk mendoj se mund t’i shtojmë diçka më speciale këtij momenti.”

Atmosfera në “Santiago Bernabéu” është përmendur shpesh si një nga faktorët kyç që kanë ndikuar në përmbysjet historike të Realit në Evropë – kur skuadrat kundërshtare fillojnë të ndiejnë presionin e kryeqytetit spanjoll.

“Atmosfera në ’Bernabéu’ është gjithmonë e jashtëzakonshme; energjia është ngjitëse. E ndiejmë, na nxjerr më të mirën. Nuk duhet t’u kërkojmë tifozëve tanë të bëjnë diçka që nuk e kanë bërë më parë. Është në dorën tonë; duhet të barazojmë energjinë e tyre dhe të japim një paraqitje që ata të ndihen krenarë.”

I pyetur nëse këtë sezon ka pasur më shumë tension apo përplasje mes lojtarëve krahasuar me sezonin e kaluar, Bellingham u përgjigj me sinqeritet:

“Është futboll. Është normale të ketë momente tensioni në fushë, emocionet janë të larta. E ngrit zërin më shumë se me nënën, babain apo gruan tënde – kemi një marrëdhënie ndryshe. Duhet të jemi të sinqertë me njëri-tjetrin. Ju e theksoni më shumë se sa ne vetë, por duhet të kemi atë ashpërsi brenda grupit. Për çdo reagim negativ, ka 20 pozitivë. Por e respektojmë njëri-tjetrin dhe kjo na lejon të jemi të ndershëm. Sa i përket forcës mendore – e kemi. Në këtë ndeshje nuk mund të hysh me mendimin se përmbysja nuk është e mundur. Jemi gati, të motivuar dhe mezi e presim.”

21-vjeçari foli me vetëbesim për skuadrën dhe përmbysjen, duke theksuar se ky besim buron nga cilësia e tyre dhe nga përvoja e mëparshme:

“Duhet të shohim diçka shumë më të mirë se sa në ndeshjen e parë. Më shumë përkushtim, më shumë kontroll të topit… shumë gjëra. Nuk dhamë maksimumin, por e dimë që mund të bëjmë shumë më mirë – dhe këtë duam ta tregojmë nesër. Edhe pse luajtëm thuajse aq keq sa mundëm, është interesante që patëm gjithsesi disa raste. E dimë që kemi cilësinë.”

Sa i përket Arsenalit, ai nuk u shfaq i befasuar:

“Na duhet të kemi besim se lojtarët do të japin gjithçka. Ka pasur mbrëmje magjike në ‘Bernabéu’ dhe besojmë se mund të bëjmë më mirë. Duhet të rrisim nivelin e përqendrimit dhe mund t’ia dalim. Nuk jemi budallenj, por kemi besim te vetja. Arsenali nuk na surprizoi. Goditjet e dënimit ishin surprizë – nuk e kam parë Declan Rice të bëjë atë më parë – por janë një skuadër shumë e mirë dhe kanë një trajner të shkëlqyer.”

Sipas Bellingham, që në autobusin e skuadrës pas humbjes në Londër, atmosfera u përqendrua te përmbysja:

“Atmosfera në dhomën e zhveshjes është e pabesueshme. Ndeshja e parë ishte një nga rezultatet më të këqija që mund të imagjinonim, por tani të gjithë mendojnë për përmbysjen. Do të thotë që je te klubi më i mirë në botë. Ka presion, natyrisht, por ne e dimë që duhet të japim maksimumin.”

Një ndër çështjet që është diskutuar shumë së fundmi është ajo e kilometrave të përshkuara nga lojtarët – me Arsenalin që kishte vrapuar shumë më tepër në ndeshjen e parë:

“Është e vërtetë që nëse vrapon më shumë, ke më shumë mundësi. Po, ndikon në lojë. Por e njëjta ndodhi edhe vjet: nuk vrapuam më shumë se të tjerët dhe fituam Ligën e Kampionëve. Duhet të dimë si të vrapojmë, jo vetëm të vrapojmë. Nesër do të duam të vrapojmë më shumë dhe shpresojmë që të kemi një plan më të mirë për ta bërë këtë.”

Sipas raportimeve, Bellingham ka pasur një përplasje në stërvitje me Antonio Rudiger të premten – çka shpjegon pyetjet e shumta për tensionin brenda grupit. Ai gjithashtu raportohet se ka mbajtur një fjalim për të motivuar skuadrën pas humbjes, duke u përpjekur të zgjojë reagimin e nevojshëm për një mbrëmje epike në Madrid.