Përfaqësues të Kosovës dhe të Komisionit Evropian kanë zhvilluar sot në Prishtinë takimin vjetor të Komitetit Monitorues të Instrumentit të Asistencës së Para-Anëtarësimit (IPA), ku u diskutua për zbatimin e mbështetjes financiare dhe teknike të Bashkimit Evropian, si dhe për avancimin e reformave që lidhen me procesin e integrimit evropian.

Takimi u bashkëkryesua nga Koordinatori Kombëtar për IPA-n, Florim Canolli, dhe Shefi i Njësisë për Serbinë dhe Kosovën në Drejtorinë e Përgjithshme të Komisionit Evropian për Zgjerim dhe Fqinjësinë Lindore, Jiri Plecity.

Sipas komunikatës së Zyrës së Kryeministrit, diskutimet u fokusuan në progresin e përgjithshëm të implementimit të mbështetjes së Bashkimit Evropian në sektorë të ndryshëm, duke përfshirë sundimin e ligjit, reformën e administratës publike, zhvillimin e sektorit privat, kapitalin njerëzor dhe shoqërinë gjithëpërfshirëse.

“Komisioni Evropian mirëpriti përkushtimin e Qeverisë për forcimin e kapacitetit absorbues të Kosovës dhe përmirësimin e koordinimit të përgjithshëm të donatorëve”, thuhet në komunikatë.

Në takim u trajtuan edhe investimet e Bashkimit Evropian në Kosovë, të realizuara përmes Kornizës së Investimeve për Ballkanin Perëndimor (WBIF) dhe programeve të Bashkëpunimit Ndërkufitar (CBC).

Komisioni Evropian vlerësoi progresin e arritur në zbatimin e asistencës IPA, por theksoi nevojën për realizimin në kohë të projekteve të dakorduara.

“U theksua se disa projekte sfiduese kërkojnë veprime të menjëhershme nga autoritetet relevante për të siguruar zbatimin e tyre të suksesshëm dhe për t’i avancuar reformat esenciale për rrugën evropiane të Kosovës”, thuhet më tej në komunikatë.

Nga ana e saj, Kosova riafirmoi përkushtimin për monitorimin e afërt të projekteve dhe zbatimin efektiv të reformave të mbështetura nga Bashkimi Evropian.

Të dyja palët u dakorduan të vazhdojnë bashkëpunimin për të rritur efektin e asistencës së IPA-s dhe për të mbështetur realizimin sa më efikas të reformave.

Sipas Zyrës së Kryeministrit, Bashkimi Evropian mbetet partneri më i madh financiar i Kosovës, me mbi 3.7 miliardë euro investime në vend që nga viti 1999. /Lajmi.net/