Sokol Bashota u pyet nga trupi gjykues sot në Hagë se a ka qenë ndonjëri prej të akuzuarve i përfshirë në shkrimin apo publikimin e komunikatave të UÇK-së me 1997-ën.

Lidhur më këtë Bashota u përgjigj duke thënë se nuk e beson pasi që sipas tij asnjëri se ka pas përgjegjësi.

“Jo se besoj. S’ka pas përgjegjësi asnjëri prej tyre në atë kohë për me e ba një gja të tillë”, tha Bashota, raporton “Betimi për Drejtësi“.

Fillimisht, dëshmitari u përball me deklaratat e Rexhep Selimit i cili kishte thënë se gjatë 1997-ës kryesisht me komunikatat ishte merr Sokol Bashota.

“Ai ka mujt me supozu por unë nuk e kam shkru asnjë komunikatë”, tha dëshmitari.

Gjyqtari i tha Bashotes së sipas deklaratës së tij, në atë kohë Thaçin dhe Veselin nuk kanë qenë në Kosovë dhe si mund të jetë i sigurt që komunikatat nuk janë shkruar nga ata.

“Duke iu referuar pozicionit të tyre që e kanë pas në Ushtrinë Çlirimtare të Kosovës për atë kohë. Unë nuk muj me e paragjyku asnjërin se a ka mujt apo s’ka mujt me e shkru ndonjë komunikatë, por që pozicion për me fol apo me shkru diçka për UÇK-në nuk kanë pas dhe nuk e di nëse kanë muj me shkru apo jo”, tha Bashota.

Bashota tha se kryesisht Nait Hasani dhe Xheladin Gashi janë marrë me publikimin e deklaratave nga jashtë, por që vetë ai nuk ishte marrë me gjëra të tilla.

Dëshmitari rikonfirmoi se Thaçi, Veseli dhe Krasniqi nuk ishin pjesë e Shtabit Qendror më 1997-ën. Ndërsa, për Rexhep Selimin dëshmitari tha se Xheladin Gashi përpara se të shkojë në Shqipëri i tha që duhet të jetë pjesë e shtabit tashmë edhe i akuzuari.

Megjithatë, dëshmitari tha se as Selimi nuk ka qenë anëtarë i Shtabit edhe pse mendohej që të bëhej për shkak se shtabi qendror ishte i shpërbërë.

Në anën tjetër ai tha se nuk e din që është sulmuar ndonjë druvar nga UÇK-ja në dhjetor të 1996-ës

Dëshmitarit iu shfaq një artikull gazete që ishte intervistë me Fatmir Shehollin. Ky artikull u tregua fillimisht nga mbrojtja e Krasniqit në të cilën ai thoshte se UÇK-ja nuk ia ka vrarë babain e tij.

Lidhur me këtë, dëshmitari u pyet se a e njeh Maliq Shehollin (babai i Fatmir Shehollit) që shihej në komunikatën 28 të UÇK-së. Dëshmitari u përgjigj me ‘jo’ dhe mohoi se ka dijeni se çfarë ki ka ndodhur këtij personi, a është vrarë dhe kush e ka vrarë.

“E di që është arrestu nga Policia e Serbisë apo nga Shërbimi Sekret i Serbisë në Kosovë”, tha dëshmitari duke shtuar se nuk e din arsyen se pse është arrestuar.