Barcelona ka qenë shumë aktive në tregun e transferimeve gjatë javëve të fundit, me mundësinë që deri javën tjetër të finalizohen tre afrime.

Joan Garcia tashmë është bashkuar me klubin, dhe marrëveshja për Nico Ëilliams pritet të mbyllet më 1 ose 2 korrik, duke e çuar në dy numrin e lojtarëve të rinj. Dhe atyre do t’u bashkohet edhe Roony Bardghji.

Më herët këtë javë u raportua se Barcelona ka arritur marrëveshje me FC Kobenhavn për të transferuar Bardghji. Besohet se për anësorin suedez do të paguhen 2–3 milionë euro, ndërsa kontrata e tij në Danimarkë skadon në dhjetor.

Barcelona duket se ka mposhtur FC Porto në garën për të nënshkruar me Bardghji, i cili do të luajë mes ekipit të parë dhe Barça Atlètic gjatë muajve të parë në Katalonjë. Sipas Fabrizio Romanos, marrëveshja pritet të përfundojë javën tjetër pasi 19-vjeçari t’i nënshtrohet kontrolleve mjekësore.

Bardghji ishte cilësuar si një nga anësorët më premtues të Europës që në fillim të vitit 2024, por një dëmtim në ligamentin e gjurit (ACL) e ka penguar zhvillimin e tij. Megjithatë, Barcelona vazhdon të besojë në potencialin e tij dhe mendon se ai mund të zhvillohet nën drejtimin e Hansi Flick.

Bardghji luan kryesisht si anësor i djathtë, kështu që në të ardhmen do të garojë për një vend me Lamine Yamal dhe Raphinhan në ekipin e parë. Por ai do të ketë mundësi të tregojë veten në varësi të formës që do të shfaqë me Barça Atlètic, që sezonin tjetër do të luajë në kategorinë e katërt të futbollit spanjoll.

Barcelona pritet të shpallë zyrtarisht afrimin e Bardghji gjatë muajit korrik, por marrëveshja do të mbyllet javën e ardhshme. Duke marrë parasysh rolin që pritet të ketë, ai mund të debutojë gjatë turneut parasezonal të klubit në Azi, i cili nis në mesin e korrikut.