Barcelona është dënuar me 602 euro gjobë nga Federata Spanjolle e Futbollit, pas ankesës së Atletico Madridit për kontaktet me sulmuesin argjentinas Julián Álvarez pa njoftuar paraprakisht klubin madrilen me shkrim.

Sanksioni u vendos në bazë të nenit 133 të rregullores së federatës.

Atletico iu drejtua edhe FIFA-s, por kjo e fundit deklaroi se nuk kishte juridiksion për rastin. Álvarez ka kontratë me klubin madrilen deri në vitin 2030.

Sulmuesi kishte shprehur dëshirën për t’iu bashkuar Barcelonës, duke shkaktuar pakënaqësi te tifozët e Atleticos. Megjithatë, pas golit të fitores ndaj Deportivo La Corunës, ai kërkoi falje për deklaratat e tij.

“Ishte gabim. E kuptoj pse tifozët janë të zemëruar. Po të isha tifoz, edhe unë do të zemërohesha”, deklaroi Álvarez.

Argjentinasi duket se po e përmirëson marrëdhënien me tifozët, pasi pas golit të fundit mori duartrokitje në këmbë nga një pjesë e publikut në stadiumin Metropolitano.