Neymar do të jetë në qendër të vëmendjes sonte në duelin mes Barcelonës dhe Celticut në kuadër të Grupit H në Ligën e Kampionëve.

Në mungesë të Lionel Messit të lënduar, braziliani do të marrë përgjegjësinë e udhëheqjes së repartit sulmues në përballje me Celticun, skuadër që befasoi gjigantin katalan në po të njëjtën fazë të garës në edicionin e kaluar duke e mposhtur 2-1 në Celtic Park.

Neymar kaloi duelin e fundjavës në La Ligë kundër Almerias në bankën rezervë andaj do të jetë i pushuar mirë para përballjes me ekipin skocez.

Trajneri Gerardo Martino nuk ka treguar saktë rolin në të cilin do të aktivizohet Neymar, por pritet që braziliani të angazhohet në krahun e majtë prej ku është paraqitur mjaft mirë deri më tani gjatë këtij sezoni duke dhënë asistime në golat e Messit, Fabregasit e të tjerëve.

Nëse zakonisht thuhet se ‘Barcelona është e Messit’, së paku sonte do të jetë e Neymarit.