Avokati Besnik Berisha, i cili mbron njërin nga pesë policët e arrestuar në rastin e vdekjes së 27-vjeçarit Agon Zejnullahu në Lipjan, ka mohuar pretendimet se viktima është ngufatur nga policia gjatë arrestimit.

Ai ka deklaruar se Agoni ka pasur tri lloje gjakderdhjesh dhe se shkaku i vdekjes nuk ishte ngufatja.

“Po ta thom ty qitu, Agoni i ka tri lloje gj*kderdhjesh, nuk e ngufatë polici, pikë!” ka deklaruar Berisha gjatë një paraqitjeje televizive në T7, transmeton lajmi.net.

Ndaj pesë zyrtarëve policorë është caktuar masa e paraburgimit, ndërsa ata po hetohen për veprën penale “Vrasje nga pakujdesia”. Sipas Prokurorisë, policët dyshohet se gjatë ndërhyrjes së tyre në arrestimin e Zejnullahut kanë tejkaluar kompetencat, duke rezultuar në vdekjen e të riut. Rasti ka ngjallur reagime të shumta në opinionin publik dhe institucionet përkatëse kanë premtuar hetim të plotë dhe transparent.

Më 7 korrik 2025, rreth mesnatës, Policia e Kosovës ndërhyri në Lipjan pas një raportimi për një person që po shqetësonte kalimtarët. Personi në fjalë ishte 27-vjeçari Agon Zejnullahu. Gjatë ndërhyrjes, ai u arrestua nga pesë zyrtarë policorë, të cilët përdorën forcë fizike dhe sprej. Pas arrestimit, Agoni humbi ndjenjat dhe, pavarësisht mbërritjes së autoambulancës, u konstatua i vdekur në vend.

Pesë policët janë arrestuar dhe ndodhen në paraburgim, nën dyshimin për veprën penale “vrasje nga pakujdesia”. Rasti është nën hetim nga Prokuroria dhe IPK, ndërsa ka nxitur reagime të shumta publike dhe politike./lajmi.net/