Dy persona janë arratisur të mërkurën mbrëma nga Qendra Edukuese Korrektuese në Lipjan, por janë arrestuar pas një aksioni të shpejtë të Policisë së Kosovës.

Sipas raportit 24-orësh të policisë, rasti ka ndodhur më 3 qershor rreth orës 21:28, kur zyrtarët korrektues kanë njoftuar organet e rendit se dy persona kishin ikur nga qendra, shkruan lajmi.net.

Menjëherë pas marrjes së informacionit, policia ka ndërmarrë veprime taktiko-operative për lokalizimin e tyre.

Si rezultat i operacionit, të dy të arratisurit janë arrestuar dhe janë kthyer në Qendrën Korrektuese në Lipjan.

Lidhur me rastin, autoritetet nuk kanë dhënë detaje shtesë, ndërsa procedurat e nevojshme janë duke u zhvilluar.

Njoftimi i plotë:

Lipjan / 03.06.2026 – 21:28. Policia është njoftuar nga zyrtarët korrektues të Qendrës Edukuese Korrektuese në Lipjan se dy persona kishin ikur nga qendra. Policia me të marr informacionin ka ndërmarr veprimet taktiko-operative ku edhe  ka arritur ti arrestojë të dyshuarit të cilët janë kthyer në Qendër Korrektuese në Lipjan. /Lajmi.net/