Të Infektuar: 102.742

Të Shëruar: 89.141

Të Vdekur: 2.105

Anulohen dy çmime letrare

15:18 | 12 Shkurt 2021

Asociacioni alternativ i shkrimtarëve të Kosovës , Ars Clubi “Beqir Musliu” ka anuluar sot dy çmime letrare.

Asociacioni alternativ i shkrimtarëve të Kosovës , Ars Clubi “Beqir Musliu”,me seli në Gjilan, si projektues dhe organizues i pjesës letrare të Manifestimit kombëtar të Kulturës “Flaka e Janarit” 2021, të titulluar si “Pena e Flakës”, përkatësisht Grupi i Punës i kësaj shtylle të Manifestimit në përbërje Sabit Rrustemi, Albina Idrizi e Nexhat Rexha, ka bërë verifikimin e krijimeve të shpërblyera letrare nga ana e Jurisë profesionale ( Adem Gashi, Linditë Ramushi Dushku e Mehmetali Rexhepi ) dhe i konstaton këto gjetje:

Poezia e shpërblyer me Çmimin e dytë nga ana e Jurisë, e titulluar BALADË, me shifër “Vetëm 5 minuta” autore e së cilës doli të jetë Rozafë Shpuza nga Shkodra,  është  publikuar më parë në gazetën ( Portal ) OBSEVERKULT,  me datën 17 tetor 2019.

Tregimi i shpërblyer me Çmimin e tretë nga ana e Jurisë letrare, i titulluar PALLATI I SORRAVE, pa shifër, që doli të jetë më pas i Bajramali Selimit nga Gostivari, gjithashtu rezultoi i publikuar me datën 3 janar 2021 në Portalin A NEWS 24.

Nisur nga këto dy të dhëna,  shihet qartë se publikimi paraprak i këtyre dy krijimeve e zhvlerëson anonimitetin e tyre dhe bie ndesh me kriteret  e Konkursit anonim letrar, të bëra publike që nga 9 dhjetori i vitit 2020 e deri më 9 janar 2021, në faqen zyrtare të komunës së Gjilanit, në disa portale gjithashtu po edhe përmes rrjeteve sociale nga anëtarët e Ars Clubit “Beqir Musliu”,kritere këto që kanë qenë fuqi tash e tridhjetë vjet.

Prandaj, këto dy Çmime, anulohen vetvetiu. /Lajmi.net/